എം എം ടി മലയാളി മനസ് ബഹ്റൈൻ്റെ 54-ാം ദേശീയ ദിനവും സംഘടനയുടെ എട്ടാമത് വാർഷികവും സംയുക്തമായി സിഞ്ച് അൽ അഹ്ലി ക്ലബ് ഓഡിറ്റോറിയത്തിൽ വച്ച് ഡിസംബർ 16-ാം തീയതി വൈകിട്ട് ഏഴ് മണി മുതൽ സ്നേഹ സ്പർശം 2025 എന്ന പേരിൽ പ്രൗഢഗംഭീരമായി നടത്തപ്പെട്ടു. എം എം ടീമിൻ്റെ പ്രസിഡൻ്റ് ഫിറോസ് മാഹിയുടെ അധ്യക്ഷതയിൽ കൂടിയ സമ്മേളനത്തിൽ സംഘടനയുടെ രക്ഷാധികാരിയും ബഹ്റൈനിലെ പ്രമുഖ ജീവകാരുണ്യ പ്രവർത്തകനുമായ ബഷീർ അമ്പലായി ഉദ്ഘാടനം ചെയ്തു.
പ്രവാസി ലീഗ് സെല്ലിന്റെ ബഹ്റൈൻ ചാപ്റ്റർ പ്രസിഡൻ്റും ഗ്ലോബൽ പിആർഒയുമായ സുധീർ തിരുനിലത്ത്, ബഹ്റൈനിലെ ജീവകാരുണ്യ പ്രവർത്തന രംഗത്തെ നിറ സാന്നിധ്യമായ ഫസൽ ഭായ്, പ്രവാസി ഗൈഡൻസ് ഫോറത്തിന്റെ പ്രസിഡൻ്റും സ്റ്റുഡൻസ്, ഫാമിലി കൗൺസിലറുമായ ബിനു ബിജു എന്നിവർ ആശംസ അർപ്പിച്ച ചടങ്ങിൽ എബിമോൻ യോഹന്നാൻ സ്വാഗതവും ജീന കൃതജ്ഞതയും അറിയിച്ചു. എം എം ടീമിൻ്റെ സീനിയർ മെമ്പേഴ്സിനു മൊമെന്റോ നൽകി ആദരിച്ച ചടങ്ങിൽ വച്ച് ബഹ്റൈനിലെ പ്രമുഖ ജീവകാരുണ്യ പ്രവർത്തകനായ സാബു ചിറമേലിനെ സ്നേഹ സ്പർശം 2025 അവാർഡ് നൽകി ആദരിക്കുകയും ചെയ്തു. പ്രസ്തുത ചടങ്ങിൽ വെച്ച് ഓട്ടിസം ബാധിച്ച ഒരു കുട്ടിക്ക് സ്പീച്ച് തെറാപ്പിക്ക് ആവശ്യമായ സഹായം നൽകുകയും ഈയിടെ ബഹ്റൈനിൽ വെച്ച് പിതാവ് മരണപ്പെട്ട മൂന്ന് കുട്ടികൾ അടങ്ങിയ കുടുംബത്തിന് സാമ്പത്തിക സഹായവും നൽകാൻ സാധിച്ചു.
മലയാളത്തിന്റെ കോമഡി രാജാവ് മഹേഷ് കുഞ്ഞുമോൻ നിറഞ്ഞ സദസിൽ അവതരിപ്പിച്ച വ്യത്യസ്തങ്ങളായ പരിപാടികൾ കാണികൾക്ക് ഒരു വ്യത്യസ്തമായ അനുഭവമായിരുന്നു, മലയാളത്തിന്റെ പ്രമുഖ ഗായകനായ മുഥൻ ഐഡിയ സ്റ്റാർ സിംഗർ ഫെയിം പാർവതി എന്നിവർ നയിച്ച ഗാനസന്ധ്യ ഗാനസ്വാദകർക്ക് ഒരു പുതിയ അനുഭവമായിരുന്നു. ഔറയുടെ ബാനറിൽ അവതരിപ്പിച്ച പ്രോഗ്രാമുകൾക്ക് ഇഷിക പ്രദീപും ധനേഷും അവതാരകരായിരുന്നു. പരിപാടികൾക്ക് എം എം ടീം കോർഡിനേറ്റർ ജി. ആനന്ദ്ൻ്റെ നേതൃത്വത്തിലുള്ള വാർഷിക ആഘോഷ കമ്മിറ്റി നേതൃത്വം നൽകി.
Content Highlights: Bahrain's 54th National Day and MM Team Malayali Manas' 8th anniversary celebrated